❧ À Nicolle Le Feure à qui ledit lassé de Repos donna le jour de l’An en bonne estraine unnes heures laquelle le pria d’aprendre à dancer
Prenez en gré ceste petite estraine
Et vous monstrez, la recepvant, humaine.
Sy myeulx avois, vous l’auriez sans sejour,
Priant Jesus vous tenir en ce jour
Et en tous temps saine de corps et membre.
Quant, à part moy, vostre beauté remembre,
Vostre maintien tant honneste et si grave,
Vostre gent corps si bien vestu et brave,
Je ne sçaurois juger par ma simplesse
Sy estes femme, ou si estes deesse
Et vouldroys bien, se amours pour moy estoit,
Pour me monster où ses servans monstoit.
Peuse acquerir de vous la seulle grace !
En tout honneur, certes, oultre ne passe.
Mais je perds temps de vouloir là pencer
Car je ne puis plus aprendre à dancer :
Je suys trop lourd pour gecter gembe en l’air
Mais bien sçauroys autre dance ebranler
Quant dieu auroit, par sa bonté immance,
Faict de nous deux ung honneste accordance.
Nicole, doncq, gectez arriere Esmoy,
Je vous estraine : or sus, estrainez moy.